Karong adlawa, September 15, 2022 gipahigayon ang graduation ceremony sa Farmer Field School (FFS) didto sa Dalingding Covered Court kun diin 28 ka mag-uuma ang migradwar human nila makumpleto ang 16 weeks training kabahin sa saktong pag-atiman ug pagdumala sa pagpananom og mais.
Gipangunahan ni Vice Mayor Ali Abucay ug opisyales sa Department of Agriculture (DA), Provincial Agriculturist Office ug Municipal Agriculture Office ang paghatag sa diploma ngadto sa mga mag-uuma nga milampos sa season-long training FFS on Integrated Pest & Nutrient Management for Corn.
Sa iyang mensahe, mibutyag si DA 7 Senior Science Research Specialist Norberto Ouano nga mohatag ang DA og libre nga binhi ngadto sa mag-uuma aron sa pag-ugmad sa ilang umaabot nga 50 hectares model farm. Ulian sab sila sa presyo sa abuno ug ihatag kini sa kapunungan isip starting capital aron mabuhi ug molambo ang asosasyon. Dugang pa ni Ouano na kon nindot ug hapsay ang dagan sa kapunungan diha na magsugod ang daghan nga hinabang gikan DA, sama sa tractor ug corn sheller. Tinguha sa DA nga mapalambo gayud ang agrikultura sa norte ug mapalapdan ang yellow corn production.
Samtang si Vice Mayor Abucay mipahinundom sa mag-uuma na isip beneficiaries sa agrarian reform program, kinahanglan nga atimanon nila ang yuta nga nadawat gikan sa gobyerno. Mipahimangno usab ang vice mayor sa mag-uuma nga hatagan kini og dakong bili ug di gayud ibaligya ang ilang yuta. Tungod kay ang LGU andam motabang sa ilang panginahanglan sama sa tractor fuel subsidy ug ang pag market o pagbaligya sa ilang harvest pinaagi sa ordinansa nga giluwat sa Sangguniang Bayan nga mohatag og 5 kilos corn sa tanang senior citizens matag tuig, ang Eco-bricks Mo, Bigas Ko sa MENRO, ug umaabot pang mga programa.
Mitambong sa kalihukan sila Provincial Corn Coordinator Marya Zea Villaganas, DA 7 Agribusiness and Marketing Division OIC David Amrinto, Municipal Agriculture Office OIC Henry Rondina, kanhi Municipal Agriculturist Maria Lina Jugan, ug Barangay Dalingding Officials.
