Gipahigayon karung adlawa, November 22, 2023 sa Barangay Bitoon Covered Court ang turn over sa usa ka unit nga multi-tiller cultivator gikan sa Department of Agriculture (DA) Region 7.
Ang bag-ong kahimanan nga magsilbing dakong tabang sa pag-amuma ug pagpalambo sa atong kaumahan gi turnover sa DA-7 padung sa LGU pinaagi ni Mayor Sun Shimura paingon usab ngadto sa beneficiary nga mao ang mga mag-uuma sa Bitoon Agrarian Reform Beneficiaries Association (BARBA).
Atol sa maong turn-over ceremony, maukyabon nga gipahibalo ni Mayor Sun ang pagpalansad sa “Sugbo Merkadong Barato” karung November 28, 2023 nga ipahimutang sa Municipal Covered Court (ang tennis court kaniadto) kilid sa Lamberto R. Te Cultural Center. Ang maong programa gimugna sa atong inahan sa probinsya, Gov. Gwendolyn Garcia, nga maghatag og oportunidad sa atong mga local farmers nga libreng makapamaligya sa ilang mga ani dinhi sa atong lungsod.
Ang turn-over ceremony gipangunahan sa atong Municipal Agriculture Office pinaagi sa Officer in Charge Henry Rondina ug sa iyang mga kaubanan. Mitambong sa maong seremonya sila DA-7 Regional Executive Director Angel Enriquez, Provincial Agricultural Technology Coordinating Officer Marina Viniegas, Municipal Agrarian Reform Program Officer Gay Visitacion, ug mga opisyales sa Barangay Bitoon.
